Toegepaste Linguistiek as dissipline

Abstract

Die Toegepaste Linguistiek is ’n relevante en beroepsgerigte studierigting wat tans baie veld wen. Daar is op die oomblik (1983) sewe universiteite in Suid-Afrika wat kursusse in hierdie rigting aanbied, waarvan die PU vir CHO die jongste is. Dit is slegs in die afgelope vier jaar dat die Toegepaste Linguistiek sy kinderskoene hier ontgroei het, hoewel dit reeds in 1946 vir die eerste keer as 'n universiteitsdissipline aan die Universiteit van Michigan in die VSA erken is. In Brittanje is die School for Applied Linguistics in 1958 aan die Universiteit van Edinburgh in die lewe geroep, en sedertdien het die dissipline met rasse skrede gegroei.